Hadi

 

Por dahil dai tigtawanang cinco si Totoy kan saiyang ina,

bitbit ang sarong niyog paduman sa sentro para ipabakal niya.

Bulan nin Mayo alagad dai pa tapos an klase,

Sa tahaw kan pandemya, si Totoy nagmomodule na pan-grade three.

Kaya atupag sa kawat ta dai man man masabotan an nakasurat,

maski na si ina na bising-bisi sa iyang pinangat.

"Cinco lang, ate."

An kaogmahan kan aki an lipot kan barya sa iyang palad.

Makababakal na siyang teks ki Fernando, ang hari kan saindang tinampo.

 

Piso, benteng pidaso. Cinco, sanggatos na pidaso.

Wan, To, Tri, Por, Payb, Sex, Sivin, Eyt, Nay—

"Bako 'yan, hilingon mo ta may gisi,"

Naynte-payb, naynte-sex, naynte-sivin, naynte—

"Palitan mo 'yan, itong may badil"

Sanggatos na teks, Demon Slayer, Dragon Ball, Boruto, asin ang badil ni Cardo.

 

Ara pa man giraray si Totoy ki Fernando. Ang panga

garo nawaraang turnilyo, nakabuka.

Ang hibog kan teks sin laba kan takyag ni Totoy.

Pirmi pang gana si Fernando sa mga kawat.

Pirming nakatiyaya an saiyang pamato.

Ang hadi kan mga teks, an grade six na si Fernando.

 

1 versus 1, si Totoy dai pinatulan ni Fernando ta kadikiton man daa ang teks.

An kawat kaya ni Fernando, dai nang birilangan, tansya-tansya na lang.

Bugtak an sarong gugom, pag gana, pantayon na lang kan teks an pagbayad.

Sa kaso ni Totoy, sarong bugtakan lang daa an sanggatos niyang teks.

Habo man ni Fernando an mabitin.

Kun mabilang man daa, makahugakon. Mapagalon.

O baka dai  lang aram an numerong sunod sa sanggatos.

 

Naghagad utro si Totoy nin cinco sa ina niya. Bisi man

giraray sa pinangat asin sa sentro na naman an pigdumanan.

Tolong pidaso na nin niyog an bitbit.

Tigsaro an kamot nakakapot sa tadang bunot, si saro nasa tahaw

kan duwa niyang takyag, ibabaw kan daghan.

"Quatro na lang ate an saro."

 

12 times 20, dai aram ni Totoy kon pira. Basta lagpas ining sanggatos.

Makakalaban niya na si Fernando.

Baka mapierde niya an hadi kan saindang kalye.

Totoy, an bagong hadi kan teks.

 

Sarong gugom. Ikatolong gugom.

An tanog kan pitik, luway-luway sa talinga ni Totoy.

Lunok kan laway, garo kakanon huli ta gutom.

Dangog an hangaw dungan kan paghadok kan teks sa daga.

Tiklop an pamato ni Totoy na si Cardo.

Hiling an ngirit asin Sharingan na mata ni Sarada,

an pamato ni Fernando.

 

An dai narisa ni Totoy, mahibog an pamato ni Fernando.

Duwang Sarada an pinulot kan bagong sapna,

kaya pirming matiyaya.

Sa harong nagpuli si Totoy, an ina naghahalat,

dai pa tapos an pinangat.

"Hain na an niyog na dara ni ama mo?"